ዩክሬን መዓልቲ ዝኽሪ ልደት ቀዪራ፡ ሎሚ ኣብዒላ

ኣብ ዩክሬን ዕለት ልደት ዝኽበረሉ፡ ካብ ጥሪ 7 ናብ ታሕሳስ 25 ድሕሪ ምቕያሩ፡ ዩክሬናውያን ኦርቶዶክስ ክርስትያን ሎሚ እቲ ኲናት ካብ ዝጅመር ንመጀመርያ ግዜ ኣብዛ ዕለት በዓል ልደት የኽብሩ`ለዉ። ሰበ-ስልጣን ዩክሬን ካብ ካላንደር ሩስያ ንምውጻእ ክብሉ ዝሓለፈ ዓመት ነቲ ዕለት ካብቲ ምስ ሩስያ ዘኽብርዎ ዝነበሩ ዕለት 7ተ ጥሪ ናብ ታሕሳስ 25 ኣዚሮሞ`ለዉ።

ፕረሲደንት ዩክሬን ቮሎድምር ዘለንስኪ ኣብ ዘስምዖ ናይ ልደት መደረ “ኩላትና ዩክሬናውያን ብሓደ ኢና ዘለና፡ ልደት ብሓባር ክነብዕሎ ኢና፡ ኣብዛ መዓልቲ እዚኣ ከም ሓደ ስድራን ከም ሓንቲ ሃገርን ክነብዕሎ ኢና “ ኢሉ -- ብመሰረት ጸብጻብ ኣጃንስ ፍራንስ ፕረስ።

መብዛሕትኦም ተኸተልቲ ምብራቓውያን ኣብያተ-ክርስትያናት ነቲ ጁልያን ካላንደር እዮም ዝኽተሉ፡ ንሱ ድማ ጥሪ 7ተ እዩ። እቲ ሎሚ ዝኽበር ዘሎ ግን ብመብዛሕትኦም ግሪጎርያን ካላንደር ዝኽተሉ ምዕራባውያን ዝኽበር`ዩ።

ዘለንስኪ ዝሓለፈ ሓምለ `ዩ ነቲ ናይ ምቕያር ሕጊ ፈሪምዎ- ኩሎም ዩክሬናውያን ንውርሻ ሩስያ ክሓድግዎ ኣለዎም ብምባል። ምስኡ `ውን ኣብ ግዜ ግዝኣት ሶቭዬት ዝነበሩ ሓውልታት ከልግሱ ኣሽማት ጽርግያታት `ውን ክቕየሩ ዝገብር`ዩ።