ኣሸንዳ ጀሚሩ፣ ሚ/ር ምክልኻል ብዛዕባ ኣከራኸርቲ ቦታታት ርእይቶ ኣካፊሉ

ፈለማ ብምኽንያት ለበዳ ኮቪድ ድሒሩ ድማ ብሰንኪ ኲናት በዂሩ ዝጸንሐ በዓል ኣሸንዳ ሎሚ ሰሉስ ኣብ መቐለ ብወግዒ ተኸፊቱ ኣሎ። ነዚ ዓቢ በዓል ምኽንያት ብምግባር’ውን ሚኒስተር ምክልኻል ኢትዮጵያ ዶክተር ኣብርሃም በላይ፡ ኣብ ናይ ፈስይቡክ ገጽ ኣብ ዘስፈሮ ጽሑፍ፡ ብመሰረት ስምምዕ ፕሪቶሪያ፡ ዘሰሓሕብ ቦታታት ትግራይ ብሕገ-መንግስቲ ዝምልሰሉ፡ ተመዘበልቲን ናብ ቦታኦም ንምምልስ ይስርሓሉ ከም ዘሎ ኣመልኪቱ።

ድምጺ ኣመሪካ ኣብዚ ጉዳይ ግብረ-መልሲ ንምስማዕ ካብቲ ሕጂ ብዞባ ወልቃይት ጸገዴ ሕሙራ ዝብል መጸውዒ ስም ዝፍለጥ ዘሎ ምኽትል ኣማሓዳሪን ሓላፊ ሰላምን ድሕንነትን እቲ ዞባ ዝዀኑ ኮለነል ደምቀ ዘውዱ ግብረ-መልሲ ንምስማዕ ዝግበናዮ ተደጋግሚ ፈተነ ኣይቀንዐን።