ኢትዮጵያ ተዛማዲ ርግኣት ይርአ፣ ሓያሎ ሃገራት ስክፍታአን ይገልጻ

(ዋሽንግተን) መንግስታት ኣውስትራልያ ጃፓን ኒው ዚላንድ ዓባይ ብሪጣንያ ከምኡ`ውን ኣመሪካ፡ ኣብ ቀረባ እዋን ኣብ ክልላት ኦሮሚያን ኣምሓራን ዝተወልዐን ሞት ሲቪላትን ዘይምርግጋእን ዘስዓበን ግጭት ኣሻቒሉና`ሎ ዝብል ናይ ሓባር መግለጺ ኣውጺኦም።

ከምኡ`ውን ልኡኻትን ኤምባሲታትን ሕብረት ኤውሮጳ ብሓባር ኣብ ዘውጽእዎ መግለጺ፡ ኣብ ክልል ኣምሓራ ዝተወልዐ ጎንጺ ዘተሓሳስብ`ዩ ድሕሪ ምባል መስመር ሰብኣዊ ሓገዝ ክፉት ክኸውን፡ ወጻእተኛታት ናብ ውሑስ ቦታ ክወጹን እቲ ግጭት ናብ ካልኦት ክልላት `ውን ከይልሕም ምስትውዓል ክግበር ጸዊዖም።

ኣህጉራዊ ማሕበረሰብ ኣብ ኢትዮጵያ ዘላቒ ርግኣት ክህሉ ምሕጋዙ ከም ዝቕጽል`ውን እቲ ናይ ሓባር መልእኽቲ የመልክት።

ኣህጉራዊ ኮሚሽን መርመርቲ ሰብኣዊ መሰላት ንጉዳይ ኢትዮጵያ ብወገኑ፡ ኣብ ሰሜናዊ ምዕራብ ኢትዮጵያ ብፍላይ ኣብ ክልል ኣምሓራ እናሓመቐ ዝኸይድ ዘሎ ኩነታት ጸጥታ ከምዘሻቐሎ ገሊጹ`ሎ።

እቲ ኮሚሽን ኣብቲ መግለጺኡ ኩሎም ወገናት ንሰብኣዊ መሰላት ከኽብሩን፡ ንፍልልያት ኣብ ክንዲ ብግጭት ብሰለማዊ ኣገባብ ምፍታሕ ከቐድሙን ጸዊዑ`ሎ።

ኣብ ናይ ሎሚ ውዕሎ ከተማታት ክልል ኣምሓራ ሰለማዊ ሃዋህው ሰፊንወን ምውዓሉ ነበርቲ ገሊጾም ኣለዉ።

ኣብ ከተማ ባህርዳር መጠነኛ ምንቅስቓስ ተሽከርከርቲ ምንባሩን መጓዓዝያ ኣየር`ውን ምጅማሩን መሰኻኽር ዓይኒ ንቪኦኤ ገሊጾም። እንተኾነ ብሓይልታት ጸጥታ ሰብኣዊ ጥሕሰት ከምዝፍጸም ነበርቲ ይዛረቡ`ለዉ።

ኣብ ጎንደርን ሸዋ ሮብትን `ውን ሰለማዊ መንፈስ ምውዓሉ ወሃብቲ ርእይቶ ክዛረቡ ከለዉ፡ እንተኾነ ኣገልግሎት ዝህብ ሕብረተሰብ ካብ ስግኣት ከምዘይወጸ ይገልጽ ኣሎ። ብዛዕባ ኣብቲ ሕብረተሰብ ዘሎ መረረት ካብ ወገን መንግስቲ ዝተዋህበ ርእይቶ የለን።