መንገዲ ኣየር ኢትዮጵያ ናብ ግጭት ዝርከቦ ክልል ኣምሓራ በረራታት ይስርዝ

(ዋሽንግተን) መንገዲ ኣየር ኢትዮጵያ ናብ ርእሰ-ከተማ ክልል ኣምሓራ--ባህርዳር--ዝነበሮ በረራታት ከም ዝሰረዘ ሎሚ ሰሉስ ኣፍሊጡ። ከም ሓበሬታ ኣገልግሎት ዜና ፈረንሳይ፡ እቲ መንገዲ ኣየር ናብ መብዛሕትኦም ውሑሳት ዘይኰኑ ናይቲ ክልል በረራታት’ውን ደው ኣቢሉ ኣሎ።

እቲ መንገዲ ኣየር ኣቐዲሙ ናብ ጎንደርን ላሊበላን ዝነበሮ ጕዕዞ ከም ዝሰረዘ ዝዝከር ኰይኑ፡ ድሒሩ ኣብ ዘውጽኦ ሓበሬታ ድማ ካብ ሰኑይ ክሳብ ዓርቢ ናብ ደሴ፡ ጎንደር፡ ላሊለበላን ባህርዳርን ዝነበሮ መደብ ከም ዘቋረጾ ሓቢሩ።

ሎሚ ሰሉስ ኣብ ከባቢ ባህርዳር ዘየቋርጽ ምልውዋጥ ተዅሲ ኣርፊዱ። ነበርቲ ባህርዳር ካብ ገዛውቶም ንምውጻእ ተጸጊሞም፡ ቀጻሊ ድምጺ ከበድቲ ብረታት ይሰምዑ ምህላዎም ንኣገልግሎት ዜና ፈረንሳይ ሓቢሮም።

ኣብ ትሕቲ ቍጽጽር ዕጡቓት ሚሊሻ ፋኖ ከም ዘላ ዝግለጽ ላሊበላ’ውን ብተመሳሳሊ ቀጻሊ ተዅሲ ከበድቲ ብረታት ይስምዓ ምህላዉ ነበርቲ ሓቢሮም።