ኣብ ደቡብ ሱዳን ኣብ ዋና ጽርግያ ብዝጸንሖም ናይ ድብያ መጥቃዕቲ ብውሕዱ 3ተ ተጓዓዝቲ ተቐቲሎም። በቲ ኣብ ልዕሊ ገያሾ ሒዛ ዝነበረት ኣውቶቡስ ዝተፈጸመ መጥቃዕቲ፡ 22 ካልኦት ከም ዝቖሰሉ`ውን ፖሊስ ኣፍሊጡ`ሎ። ኣብቲ ካብ ጁባ 55 ኪ. ሜ ርሒቑ ናብ ኒሙለ ኣብ ዝወስድ ዓቢይ ጽርግያ መጥቃዕቲ ዝፈጸሙ መንነቶም ዛጊት ኣይተፈልጠን- ግን ወተሃደራዊ ክዳን ዝገበሩን ካልሽን ዝዓጠቑን ምንባሮም ተጠቒሱ`ሎ። ኣብቲ ናይ ድብያ መጥቃዕቲ 2ተ ኡጋንዳውያን ዜጋታት`ውን ከምዝቖሰሉ ወሃቢ-ቓል ፖሊስ ደቡብ ሱዳን ሓቢሩ`ሎ።
እቲ ካብ ጁባ ናብ ኒሙለ ዝወስድ ጽርግያ መጥቃዕቲ ክፍጸሞ መጀመርትኡ ኣይኮኑን። ዝሓለፈ ነሓሰ`ውን ኣብ ተመሳሳሊ ጽርግያ ብዝተፈጸመ ናይ ድብያ መጥቃዕቲ፡ 7ተ ሰባት ተቐቲሎም`ዮም።
