ሚንስትሪ-ወጻኢ ኣመሪካ “ኣብ ኢትዮጵያ ብሰንኪ ኸጋጥም ዝኽእል ዕግርግርን ብዘይ-ፍርዲ ማእሰርትን “ ዜጋታቱ ናብ`ታ ሃገር እንተድኣ ገይሾም ኸጋጥሞም ብዛዕባ ዝኽእል ሓደጋ ብምጥንቃቕ፡ ነቲ ዝሓለፈ ወርሒ ሰነ 13 2017 ዘውጽኦ ናይ መገሻ መጠንቀቕታ ኣሓዲስዎ`ሎ፡
እቲ ሚንስትሪ፡ ኣብ ኢትዮጵያ ብፍላይ ድማ ኣብ ከባቢ ጎንደርን ባህርዳርን፡ ኣብ ክፋላት ኦሮሚያን ህውከት ከምዝቐጸለ ዝሕብር ሪፖርት ከምዘለዎ`ውን ይጠቅስ።
“ሃንደበታዊ ኩነታት ጸጥታ ኣብ ግምት ብምእታው” ዝበለ ሚንስትሪ ወጻኢ,፡ መንግስቲ ንኢንተርነትን ተለፎናትን ክዓጽዎ ስለዝኽእል ብዝብል ኣብ ኢትዮጵያ ዝርከቡ ኣመሪካውያን ናይ መራኸቢ ኣማራጽታት ክሕዙ መኺሩ`ሎ።
ብተወሳኺ፡ ኣመሪካውያን ኣብ ኢትዮጵያ እንተተኣሲሮም፡ መንግስቲ ኢትዮጵያ ንኢምባሲ ኣመሪካ ኣየፍልጥን`ዩ ክብል`ውን ኣጠንቂቑ`ሎ፡
