ንባዕሉ ካብ ኤርትራ ናብ ኢትዮጵያ ድሕሪ ምስጋር፡ ሎሚ ኣብ ኣመሪካ ዝርከብ ኣቶ ክብሮም ፍቕረዝጊ፡ ክልተ ደቁን ሓንቲ ሓፍቱን ናብ ኢትዮጵያ ምስ ሰገሩ ከምዝተቐተሉ ይኣምን።
ኣብ`ቲ ናይ ምስግጋር መስርሕ ቀንዲ ተዋሳኣይ ዝነበረ ጎይትኦም ብርሃነ ዝተባህለ ሚሊሻ ትግራይ ዘረባ ለዊጡ ይብል ኣቶ ክብሮም።
ካልእ ንስድራ ቤት ኣቶ ክብሮም ዘርድአ ኣቶ ጌታሁን(ምስሪ) ዝተባህለ ነጋዳይ`የ ዝበለ ድማ፡ ነቲ ጉዳይ ዝፈልጥ ኣቶ ጎይትኦም ብርሃነ`ዩ፡ ኣነ ንክሕግዝ ጥራይ ዝኣተኹ ሰብ`የ ይብል።
ኣቦ ወዲ 8ተ ዓመትን ጓል 15 ዓመትን ከምኡ ድማ ሓዊ ጓል 25 ዓመት ኣቶ ክብሮም ፍቕረዝጊ፡ ኩነታት`ቶም ቆልዑ ንምጽራይ ካብ ኣመሪካ ናብ ኢትዮጵያ ተጓዒዙ ኔሩ`ዩ። ክድውንቶምን ዝኣረገ ኣስከሬን ርእስን ኣርእዮምኒ ይብል።
ናብ`ቲ ኣስከሬን ዝተባህለ መሪሑ ዝኸደ ፖሊስ ንጉሰ ገብረስላሰ ግን፡ እቲ ሬሳ ሓዲሽ እናጨነወ ኸሎ ኣርኪበሉ`የ ይብል። ብጽምኢ ማይ ሞይቶም ክኾኑ ከምዝኽእሉ `ውን ይገልጽ።
ኣቶ ክብሮም ግን ዝሓብኡኒ ምስጢር ኣሎ ይብል፡ ኩሎም ወገናት ማለት ብኢትዮጵያ ኾነ ብኤርትራ ሬሳ ደቁን ሓፍቱን ኣብ ምርካብ ክተሓጋገዝዎ`ውን ይምሕጸን፡-
