ዋሽንግተን —
ንኽብሪ 50 ዓመት ሞያ ስነ-ጥበብ ኣወሃሃዲ ሙዚቃ ዓበደላ ኣቡበከር ብዓበይትን ናእሽቱን ስነ-ጥበባውያን ዝተዳለወ መደብ ዝሓለፈ ሰንበት ኣብ ቨርጂንያ ተኻይዱ ኔሩ።
ንዓበደላ ኣቡበከር ምስኡ ዝጀመሩን ተመክሩኡ ዝሰነዱን ስነ-ጥበባውያን መንጸፍ ዘመናዊ ሙዚቃ ኤርትራን ኪነዉን ኢሎም ይገልጽዎ ።
ኣብ ኣስመራ ኣብ መጀመርያ 70ታት ኣብ ባንድታት ሮኬት: ዘርኣይ ደረስን ማሕበር ትያትር ኣስመራን ዝፈለመ ዓብደላ ኣቡበከር፡ ብፍላይ ኣብ ስደት ምስ ከደ፡ ብኪቦርዱን ቅኒቱን ጌሩ፡ ንዘመናዊ ሙዚቃ ኤርትራ ናብ መድረኽ ዘበረኸ ፡ ብምውህሃድ ሙዚቃ ኣብ ኢትዮጵያን ኤርትራን ዓቢይ ለውጢ ዘምጽአ ምዃኑ ብኹሎም ዝፈልጥዎ ይምስከረሉ። ነዚ 50 ዓመት ዘቑጸረ ሞይኡ ክብሪ ንምሃብ`ዮም`ምበኣር፡ ኣብ ከባቢ ዋሺንግተን ዲሲን ከባቢኡን ዝርከቡ ስነ-ጥበባውያን ንታሪኹ ዝገልጽ ዶክመንታሪ ብምድላው ናይ ክብርን ኣፍልጦን ምሸት ክገብርሉ በቒዖም።
