ቫይረስ ኮረና ዘብፅሖ ፅልዋ ብምርዳእ መናእሰይ ብሰናይ ፍቓዶም ሕብረተሰብ ኣብ ምንቃሕን ብተወሳኺ ድማ ዝተፈላለዩ ናውቲ ፅርየት ኣብ ጎደናታት ብምቕራብ ህዝቢ ክጥቀመሎም ይሰርሑ ኣለዉ::
ኣብ ጎደናታት ከተማ መቐለ መሕፀቢ ኢድ ንክህሉ ብተወሳኺ ድማ ካብ ካልኦት ክልላት ናብ ትግራይ ዝኣትዉ ተጓዓዝቲ ኢዶም ተሓፂቦምን መካይኖም ድማ ብኬሚካል ተፀሪገን ንክኣትዋ ዝሰርሑ መናእሰይ ኣለዉ::
ተኽሊት ሃይላይ ኣብ ከተማ መቐለ ቫይረስ ኮረና ንምክልኻል ምስ መሓዝቱ ይሰርሕ ዘሎ መንእሰይ ሓደ እዩ:: ለበዳ ቫይረስ ኮረና ዘብፅሖ ጉድኣት ስለዝተረዳእና ኢና ኣቐዲምና ንምክልኻል ብዓቕምና ስራሓት ዝጀመርና ይብል::
እቲ ለበዳ ንምክልኻል ምሕፃብ ኢድ ኣገዳሲ ምኻኑ ውድብ ጥዕና ዓለም ብምግላፁ ኣብ ጎደናታት መቐለ መሕፀቢ ኢድ ንክህሉ ንሰብ ሃብቲ ኣዘራሪብና ስራሕ ጀሚርና ኢሉ:: እቲ ኢድ መሕፀቢ ኣብ ምዕፃውን ምኽፋትን ብኢድ ምትንኻፍ ስለዘለዎ ነዚ ንምትራፍ ድማ ብእግሪ ዝኽፈትን ዝዕፆን ምስ ሰብ ሞያ ተዘራሪብና ኣስሪሕና ይብል::
ካብ ካልኦት ክልላት ናብ ክልል ትግራይ ዝኣትዉ ተጓዓዝቲ ድማ ብሓደ ግዘ 4 ሰባት ኢዶም ዝሕፀብሉ ኣብ ከባቢ ኣሸጎደ ሰሪሖም ከምዝቐረቡ ዝተዛረበ ተኽሊት መካይን ድማ ብኬሚካል ተነፂገን ንክኣትዋ ኩነታት ኣመዓራሪና ኣለና ኢሉ:: እዚ ስራሕ ከም መበገሲ ብምግባር መንግስቲ ኣብ ኩሎም ናብ ትግራይ መእተዊ በሪ ክግበር መለዓዐሊ እዩ ይብል:: እቲ ይፍፅምዎ ዘሎ ስራሕቲ መንግስቲ ኣብ ዘይጀምሮን ብተወሳኺ ድማ ኣብ ትግራይ ቅድሚ ኣዋጅ ህፁፅ ግዘ ምእዋጁ ኣቐዲሙ እዮም ዝጀመርዎ:: ንፅጉማት ወገናት ቫይረስ ኮረና ንምክልኻል ዝሕግዞም ናውቲ ፅርየት እውን ሰብሃብቲን ግዱሳት ወገናት ብምትሕብባር ይሰርሑ ኣለው:: ኣብ ምክልኻል ለበዳ ቫይረስ ኮረና ኣሓይሉ ምስ መሓዝቱ ከምዝሰርሕ ተኽሊት ይዛረብ::
