መቐለ —
ትማሊ ኣብ ከተማ መቐለ ክፍለከተማ ኲሓ ኣብ ዝነበረ ወፍሪ ፅርየት ኣካላት ፀጥታ መንግስቲ ኣብ ልዕሊ ኣባላተይን ካልኦት መናእሰይን ኣካላዊ መጥቃዕትን ፈጺሞም ብተወሳኺ ገለ ካብቶም መንእሰያትተኣሲሮም ክብል ዓረና ትግራይ ኸሲሱ።
ኣቦ መንበር እቲ ውድብ ኣይተ ኣብርሃ ደስታ ከምዝገለፅዎ ነቶም ወገናት ዘለውዎ ኩነታት ንምርኣይ ኣበይ ከምዘለዉ ክንፈልጥ ኣይከኣልናን እውን ኢሎም።
ኣዛዚ ፖሊስ እቲ ክፍለ ከተማ ምክትል ኢንስፔክተር ገብረክርስቶስ ገብረመስቀል እቶም ዝተኣሰሩ ሰባት ሰላም ከባቢ ክዘርጉ ዝተንቀሳቐሱን ኣባላት ፖሊሰ ዝወቑዑ ሰባት ኢና ኣብ ትሕቲ ቑፅፅር ኣእቲና ኢሎም።
እቶም ኣብ ትሕቲ ቑፅፅር ዝውዓሉ ሰባት ድማ ኣብቲ ክፍለ ከተማ ከምዘለዉ እዮም ገሊፆም።
