ዓመታዊ መደረ ፕረ.ባይደን ኣብ ቅድሚ ዝተኸፋፈለ ባይቶ ኣመሪካ

ፕረዚደንት ባይደን ሎሚ ምሸት ኣብ ቅድሚ’ቲ ኣብ ቀረባ ግዜ ቃለ-ማሕላ ዝፈጸመ ባይቶ ኣመሪካ ዓመታዊ መደረ ከስምዑ'ዮም። መደረ ፕረዚደንት ክሳብ መወዳእታ ሰዓታት ምትዕርራይ ዝግበረሉ እኳ እንተዀነ፡ ንህሉዊ ቍጠባ ኣመሪካን ምምሕዳር ባይደን ነዚ ጽንኩር እዋን ንምስጋር ዝገብሮ ዘሎ መስርሕ፣ ምፍጣር ሓደስቲ ስራሓት፣ ዳግመ ህንጻን ካልእ ዓወታትን እቲ ምምሕዳር ከጠቓልል ምዃኑ ወሃቢት-ቃል ቤት ጽሕፈት ዋይት ሃውስ ካሪን ዢን ፒየሪ ገሊጻ።

ፕረዚደንት ባይደን ኣብዚ ናይ ሎሚ ምሸት ዓመታዊ መደረኡ፡ ንጉዳያት ምንጻል ጥንሲን ምቍጽጻር ብረትን ኣመልኪቱ’ውን ክዛረብ ምዃኑ ይግለጽ። እንተዀነ ባይቶ ኣመሪካ ኣብ ክልተ ሰልፍታት ተመቒልሉ ኣብ ዘሎ እዋን፡ ኣብቲ ጉዳይ ወሳኒ ስጕምቲ ንምውሳድ ኣጸጋሚ ምዃኑ ብዙሓት ይረዳድኡ።

ብድሕሪ ፕረዚደንት ባይደን ቦታ ዝሕዝ ኣፈ-ጉባኤ ኬቨን ማካርቲ፡ ድሮ’ውን ኣብ ምጥፋእ ገንዘብ መንግስቲ መርገጺታቶም ይፈላለ ኣሎ። ሰልፊ ሪፓብሊካን፡ መንግስቲ፡ ዝወሓደ ገንዘብ ከውጽእ ይጠልቡ።