ዋይት ሃውስ ፈላመይቲ ኣፍሪቃዊት ኣመሪካዊት ወሃቢ-ቃል ከምዝመዘዘ ኣፍሊጡ

ካሪን ዣን-ፒየር 13 ግንቦት 2022 ካብ ሓላፍነታ ትለቅቕ ንዘላ ወሃቢት ቃል ቤተ መንግስቲ ኣመሪካ (ዋይት ሃውስ) ጀን ሳኪ ከም እትትክኣ ዋይት ሃውስ ትማሊ ሓሙስ ኣፍሊጡ።

ኣብዚ ሕጂ እዋን ምኽትል ፀሓፊት ፕረስ ዋይት ሃውስ ብምዃን ተገልግል ዘላ ዣን-ፒየር ነቲ ሓላፍነት ዝሓዘት ፈላመይቲ ኣፍሪቃዊት ኣመሪካዊትን ፈላመይቲ ብግልፂ ኣሶጓሚት ተመሳሳሊ ፆታ ምዃና ዝገለፀትን እያ።

"እዚ ታሪኻዊ ኣጋጣሚ ንካልኦት ሰባት እውን ማዕረ ክንደይ ኣገዳሲ ምዃኑ እርዳእ እየ’’ ዝበለት ንሳ እዚ ሓላፍነት ንምቕባል ክብርን ሞገስን ይስምዓኒ ኢላ።

ፕረዚደንት ጆ ባይደን ኣብ ዘውፅእዎ መግለፂ "ካሪን ናብዚ ኣፀጋሚ ስራሕ ዘድሊ ተመኩሮ፣ክእለትን ተኣማንነትን ሒዛ ትመፅእ ኣላ ጥራሕ ዘይኮነስ ንህዝቢ ኣመሪካ ብምውካል ናይ ባይደን-ሃሪስ ምምሕዳር ስራሕ ምርድዳእ ናይ ምፍጣር ስራሕ ክትመርሕ እያ’’ ኢሎም። ንሶም ብምውሳኽ"ንዓይን ነዚ ምምሕዳርን ብርትዕቲ ድምፂ ክትኸውን እያ’’ ኢሎም ።