ዋሽንግተን —
ድሕሪ ምእላይ ፕረዚደንት ዑመር ኣልበሽር ነታ ሃገር ዝመርሑ ዘለው ወታሃደራዊ መራሕቲ ሱዳን ሲቪላዊ መንግስቲ ብቕልጡፍ ናይ ምምስራት ዕላማ ከምዘለዎም ትማሊ ሶኑይ ገሊጾም። ወሃቢ ቃል ቤት ምኽሪ ወታሃደራዊ መሰጋገሪ ሌተናል ጀነራል ሸምሸዲን ኪባሺ ትማሊ ሶኑይ ንጋዜጠኛታት ኣብ ዝሃብዎ መግለጺ ኣብ መንጎ ሓይልታት ፖለቲካን ማሕበራዊ ጉጅለታት’ታ ሃገር ልዝብ ይካየድ ከምዘሎ ገሊጾም።
ንሶም ነዚ መግለጺ ዝሃቡ ወታሃደራዊ መራሕቲ ነቲ ኮፍ ናይ ምባል ኣድማ ዘካየዱ ዘለው ተቓወምቲ'ታ ሃገር ዝተዓጸወ መንገድታት ክኽፈት ትእዛዝ ድሕሪ ምሃቦም ኣብ መንጎ ተቓወምቲን ወታሃደራዊ መራሕቲ’ታ ሃገርን ውጥረት ኣብ ዝዓረገሉ እዋን እዩ።
ካብ ሚያዝያ 6 ጀሚሮም ኣብ ኣፍደገ ዋና ቤት ጽሕፈት ሚንስትሪ ምክልካል ኮፍ ናይ ምባል ኣድማ ዘካየዱ ዘለው ተቓወምቲ ሲቪላዊ ምምሕዳር ኣብታ ሃገር ብቕልጡፍ ክምስረት ዝጠልቡ እዮም።
