ኣብ ፖለቲካ ኣመሪካ መሪሕ ተራ ዝነበሮ ሰነተር ባብ ዶል ዓሪፉ

ኣብ ካልኣይ ኩናት ዓለም ብኸቢድ ተወጊኡ ክሳብ ሞይቱ ተባሂሉ ዝተገድፈ :ድሓር ግን ኣብ ፖለቲካ ኣመሪካ መሪሕ ተራ ክጻወት ዝበቕዐ ሰነተር ባብ ዶል: ኣብ መበል 98 ዓመቱ ትማሊ ሰንበት ዓሪፉ።

ኣብ ፖለቲካ ኣመሪካ ብስሩዕ ኣዘራርብኡ ዝፍለጥን: ኣብ ሰነት ኣመሪካ ን27 ዓመታት ዘገልገልን ባብ ዶል፡ መጀመርያ ኣብ 1976 ድሕሪኡ ድሕሪ 20 ዓመታት ድማ ንሪፓብሊካን ፓርቲ ወኪሉ ኣንጻር ፕረዚደንት ቢል ክሊንተን ዝተወዳደረ`ዩ ኔሩ።

ፕረዚደንት ጆ ባይደን፡ "ባብ ዶል ካብቶም ብዙሕ ዘይትረኽቦም ኣመሪካዊ መራሒ፡ ጅግና ናይ ሓደ ዝዐበየ ወለዶ፡ ብሚዛኑን ክብሩን ዝልለ `ዩ ኔሩ" ክብል ገሊጽዎ።

ኣፈጉባኤ ባይቶ ኣመሪካ​ ናንሲ ፐሎሲ፡ ኣብ ካፒቶል ሂል ባንዴራ ኣመሪካ ትሕት ኢሉ ክትንብልበል ኣዚዛ`ላ። ፕረዚደንትታት-ነበር ዶናልድ ትራምፕ፡ ባራክ ኦባማ፡ ጆርጅ ቡሽ፡ ቢል ክሊንተን`ውን ንባብ ዶል ክብሮም ገሊጾምሉ ኣለዉ።

ኣብ ካልኣይ ኩናት ዓለም ዝሰንከለ ባብ ዶል፡ ዳሕራዋይ ግዜያት ዕድሚኡ ንገዳይም ሓርበኛታት ኣመሪካ ንምሕጋዝ ዝዓለመ ብበዓልቲ ቤቱ ዝጽዋዕ ኤልዛበት ዶል ዝተባህለ ፋውደሽን ክመርሕ ጸኒሑ።