ኣብ ዙርያ ዓለም ተቐባልነት ቫይረስኮሮና ይዓብይ ምህላው ሓደ መጽናዕቲ ኣፍሊጡ

ኣብ ዙርያ ዓለም ተቐባልነት ክታበት ኮቪድ 19 እናዓበየ ከምዝኸደ ሓደ ኣህጉራዊ መጽናዕቲ ኣፍሊጡ። እዚ ድማ ካብቲ ኣብ 2020 ዝነበረ ዝሓሸ ምዃኑ ተጠቒሱ`ሎ። ኣብዚ ድማ ስዊድንን ብሪጣንያን ተጠቀስቲ ኮይነን ኣለዋ።

እቲመጽናዕቲ ኣብ ሽዱሽተ ሃገራት ማለት ኣብ ብሪጣንያ: ፈረንሳ: ጀርመን: ጃፓን: ስዊድንን ኣሜሪካን ዝተኻየደ'ዩ።

89% ብሪጣናውያን ነቲ ክታበት ክቕበልዎ ከለዉ፡ ኣብ ስዊድን ድማ 76 % ደጊፎሞ`ለዉ። ኣብ ደቂ ኣንስትዮ እቲ ድጋፍ ክታበት ውሕድ ዝበለ ምዃኑ`ውን ተራእዩ`ሎ።

ብኻልእ ዜና ማእከል ምቁጽጻርን ምክልኻልን ሕማማት ኣሜሪካ ክታበት ጆንሰን ኣንድ ጆንሰን ንልዕሊ 18 ዕድመ ክውሃብ ትማሊ ሰንበት ኣጽዲቕዎ`ሎ- ።

ኣቐድም ኣቢሉ`ውን ምምሕዳር መግብን መድሃኒትን ኣሜሪካ ንምጥቃም ሓደ ዓቐን ክታበት `ቲ ካምፓኒ ኣጽዲቑ`ዩ- ኣስታት ኣርባዕተ ሚልየን ዓቐን ክታበት ጆንሰን ጆንሰን ክሳብ ጽባሕ ሰሉስ ክከፋፈል`ውን ኣፍቂዱ`ሎ። እዚ ድሕሪ ፋይዘርን ሞደርናን ኣብ ውሽጢ ኣሜሪካ ክውሃብ ፍቓድ ዝረኸበ ፋብሪካ ኮይኑ`ሎ።

ክታበት ጆንደን ኣንድ ጆንሰን ኣንጻር`ቲ ሕማም ዝበርትዖም 85 % ኣድማዒ ከምዝኸውን ሰበ-ስልጣን ጥዕና ኣሜሪካ ይኣምኑ።

ብኻልእ ተመሳሳሊ ዜና ፊሊፒኒስ ሎሚ ሰኑይ ሃገራዊ ወፍሪ ክታበት ኮሮናቫይረስ ኣበጊሳ ውዒላ። እቲ ወፍሪ ክታበት ዝተጀመረ ኣብታ ሃገር ብዛዕባ ክታበት ኮሮናቫይረስ ጥርጣረታት ኣብ ዘለወሉ እዋን`ዩ።

ነቲ ብቻይና ዝማዕበለ ኮሮናቫክ ዝተባህለ ክታበት መጀመርያ ዝወሰደ ዳይሬክተር ሆስፒታል ማኒላ ዶ/ር ገራርዶ ለጋስፒ ኮይኑ`ሎ።

እቲ ክታበት ዝተጀመረ- ፕፕረዚደንት ፊሊፒኒስ ሮድሪጎ ዱተርተ ብቻይና ዝተለገሰ 600 ሺሕ ዓቐን ክታበት ሓንጎፋይ ኢሉ ድሕሪ ምቕባሉ`ዩ።

ፊሊፒኒስ ንክታበት ኮቪድ ካብ ዝተቐበላ ሃገራት ደቡባዊ እስያ እታ ናይ መወዳእታ ሃገር ኮይና`ላ። ምምሕዳር ዱተርተ ሽሕ`ኳ ኣብ ህዝቢ ተቐባልነት`ቲ ክታበት ምጥርጣራት ብሰፊሑ ይርኣይ እንተሃለወ ን70 ሚልየን ዜጋታቱ ክኸትብ`ውን መዲቡ`ሎ።