ኣብ ክልል ኦሮምያ ናይ ረድኤት መግቢ ብምጥፍፋእ ዝተጠርጠሩ 54 ሰብ-መዚ ክሲ ተመስሪትዎም

ኣብ ኢትዮጵያ ክልል ኦሮምያ ንናይ ረድኤት መግቢ ብምጥፍፋእ ዝተጠርጠሩ 54 ሰብ-መዚ ተኸሲሶም።

ናይቲ ክልል ኣመራርሓ ሰራሕ ኮሚሽን ሓደጋ ስግኣት ብሓድሽ አፀዋውዑኡ ቦሳ ጎኖፋ ኣብ ዝሓለፈ ዓመታት ኣብቲ ክልል ንተሓገዝቲ ክወሃብ ዝነበረ ረድኤት ኣብ ልዕሊ ዘጠፋፍኡ ሰበ-ስልጣናት ስጉምቲ ከምዝወሰደ ገሊፁ’ሎ።

ናይ ክልል ኦሮምያ ምኽትል ሓላፊ ቦሳ ጎኖፋ ኣቶ ገረሙ ኦልቃ ዛጊት 54 ሰብ-መዚ ኣብ ቤት-ፍርዲ ክሲ ከምዝተመስረቶምን፡ ፖሊስን ዓቃቢ ሕግን ነቲ ጉዳይ የጻርይዎ ከምዘለውን ብመሰረት መርትዖን መርመራን ድማ ብይን ከም ዝወሃብ’ውን ገሊፆም።

ኣብዚ እዋን ኣብቲ ክልል 2.5 ሚልዮን ሰባት ረድኤት ዝፅበዩ ምንባሮም'ውን ተሓቢሩ'ሎ።