ዋሽንግተን —
ኣብ ኤርትራ ኣርባዕተ ሓደስቲ ክታበታት ንምትእትታው መደብ ተታሒዙ ይስረሓሉ ከምዘሎን ድሮ’ውን ብመርፍእ ዝወሃብ ሓዲሽ ኣገባብ ክታበት ሕማማት ፖልዮ፡ንፍዮን ሩቤላን ከምዝተኣታተወ ኣብ ሚንስትሪ ጥዕና ኤርትራ ሓላፊ ሃገራዊ መደባት ክታበት ኣቶ ቴድሮስ ይሕደጎ ንድምጺ ኣሜሪካ ሓቢሩ።
ካብ 2002 ዓ.ም ኣትሒዙ ክወሃብ ዝጸንሐ ሽዱሽተ ዓይነታት ክታበት ኣብ 2017 ናብ 11 ክብ ከምዝበለን ኣብዚ ሕጂ እዋን ከኣ ከም መቕጸልታ ተወሰኽቲ ክታበታት ተኣታትዮም ከምዘለዉ ኣቶ ቴድሮስ ኣብሪሁ።
ካብ ዝመጽእ ወርሒ ሕዳር ጀሚሩ፡ ካብ 9 ወርሒ ክሳብ 15ዓመት ንዝዕድሚኦም ልዕሊ 1 ሚልዮን ህጻናትን ቆልዑን ብደረጃ ሃገር ክታበት ንፍዮን ሩቤላን ከምዝወሃብ ኣቶ ተድሮስ ወሲኹ ኣረዲኡ።
