ኣብ ኢትዮጵያ ዝምስረት ሓድሽ መንግስቲ መዝነት ዝተዋህቡ ክልተ ፓርቲታት መርገጺኦም ገና ከምዘየፍለጡ ሓቢሮም

ኢዜማ ፓርቲ ብልፅግና ኣብ ዝምስርቶ ዘሎ መንግስቲ ነቲ ፓርቲ ዝተዋህበ መዝነት ከይቕበሎ ከምዝኽእል ገሊፁ።

ምምሕዳር ኣዲስ ኣበባ ትማሊ ሰሉስ ሓዱሽ መንግስቲ ክምስርት ከሎ ከንቲባ ኮይንነን ዝተመረፃ ወይዘሮ ኣዳነች ኣቤቤ ኣብ ካብኒአን ናይ ኢዜማን ናይ ኣብን ኣባላት ሸይመን ኣለዋ።

ኣባል ኢዜማ ኣቶ ግርማ ሰይፉ ኮሚሽነር ኢንቨስትመንት ኣዲስ ኣበባ ኮይኖም ተሸይሞም ኣለው።ንሬድዮ ድምፂ ኣሜሪካ ርእይትኦም ዝሃቡ ሓላፊ ህዝባዊ ርክባት ኢዜማ ኣቶ ናትናኤል ፈለቀ ናይ ኣቶ ግርማ ይኹን ናይ ካልኦት ኣባላት ፓርቲ ሽመት ተቐባልነት ዝርከብ ብውሳነ ናይቲ ጉባኤ ምዃኑ ተዛሪቦም።

ናይ ኣብን ኣቶ የሱፍ ኢብራሂም ድማ ሓላፊ ምምሕዳር ንብረት ብምዃኑ ዝተሸሙ ክኾኑ ከለው ናይ ፌደራል መንግስቲ ሓዊሱ ጠቕላላ ናይ መንግስቲ ምስረታ ቅድሚ ምዝዛሙ መርገፂኡ ከምዘፍልጥ እቲ ፓርቲ ገሊፁ ኣሎ።