ኣብ ማእከላይ ጎንደር ብዘጋጠመ ግጭት ህይወት ሰብ ምጥፉኡ ተገሊጹ

ፖሊስ ኮሚሽን ናይ ኣምሓራ ክልል ኮሚሽነር ኣበረ ኣዳሙ ኣብ ዞባ ማእኸላይ ጎንደር ወረዳ ጭልጋ ብፍላይ ማሕበረሰብ ቅማንት ኣብ ዝነብርሉ ከባቢ ቅድሚ ሓሙሽተ መዓልታት ብሰንኪ ዝጀመረ ግጭት ህይወት ሰብ ምጥፍኡን ንብረት ምዕናውን ንድምጺ ኣሜሪካ ገሊፆም።

እቲ ግጭት ኣብ መንጎ ኣብቲ ከባቢ ዝንቀሳቐሱ ዕጡቓትን ፍሉይ ሓይሊ ናይቲ ክልልን ዝተኻየደ ምዃኑ ብምግላፅ ዝንቀሳቐሱ ዘለው ዕጡቓት ስልጠና ወሲዶም ናይቲ ከባቢ ሰላም ይዝርጉ ኣለው ናይቲ ክልል ፍሉይ ሓይሊን ሓይልታት ምክልኻልን ድማ ነዚ ንምቁጽጻር ይጽዕሩ ኣለው ኢሎም።

ሓደ ሽሞም ክግለፀሎም ዘይደለዩ ኣባል ማሕበረሰብ ቅማንት ዛጊት ዝተቐትሉ ልዕሊ ሸሞንተ ሰባት ዝቖሰሉ ድማ ሸውዓት ሰባት ከምዝኾኑ ብምሕባር እቲ ግጭት ንናይ ቅማንት ኮሚቴ ንምሓዝ ብዝተዋፈሩን ፍሉይ ሓይልታትን ፋኖን እዩ ክብሉ ሓቢሮም።