ኣብ ሊብያ ኣብ መንጎ ሚሊሻ ብዝተፈጥረ ኲናት 5 ሰባት ሞይቶም

ኣብ ምዕራባዊ ሊብያ ኣብ መንጎ ተፃባእቲ ሚሊሽያታት‘ቲ ከባቢ ብዝተፈጥረ ሓድሽ ዙር ኲናት ብዉሑዱ ሓሙሽተ ሰባት ከምዝተቐትሉ ተገሊፁ።

ካብ መንጎ እቶም ዝተቐትሉ ጓል 10-ዓመት ቆልዓ ከምትርከቦምንእቲ ኲናት ሎሚ ሰኑይ'ዉን ቀፂሉ ከም ዝወዓለ ሰበ ስልጣን አፍሊጦም።

እዚ ናይ ሕጂ ኲናት ነታ ንዝሓለፈ 10 ዓመታት ብህውከት ተሓሚሳ ዘላ ሰሜን ኣፍሪቃዊት ሃገር’ቲ ዳሕረዋይ ኲናት’ዩ።

እቲ ኲናት ትማሊ ሰንበት ኣብ ምዕራባዊት ከተማ ዛውየ ዕጡቓት ጉጅለታት ከም ኣብ ካልኦት ብነዳዲ ዘይቲ ዝሃብተማ ከተማታት ፅልወኦም ንምስፋን ኣብ ዝገብርዎ ውድድር ዝተፈጥረ ምዃኑ ተገሊፁ’ሎ።

ሊብያ ናብ ህውከት ዝጠሓለት ብኪዳን ሃገራት ሰሜን አትላንቲክ ዝድገፍ ምልዕዓል ነቶም ናይ ነዊሕ እዋን ውልቀ መላኺ መሃመድ ጋዳፊ ዓልዩ ድሕሪ ምቅታሉ ካብ 2011 ንደሓር እያ።