ኣመሪካ: ምሉእ ክታበት ንዝወሰዱ ሰባት ናይ ኣየር ዶባታ ክትኸፍት ምዃና ትገልጽ

ኣመሪካ ካብቶም ተቐባልነት ዘለዎም ዓይነት ክታበታት ንዝወሰዱን ከምኡ'ውን ቅድሚ ምግያሾም ኣብ ውሽጢ ዘሎ 24 ሰዓታት ካብ ቫይረስ ኮሮና ናጻ ምዃኖም ዘርኢ ሓባሪ ሰነድ ዝሓዙ ሰባት፣ ብነፈርቲ ናብ ኣመሪካ ንክኣትው ከምዝፍቀደሎም ኣብ’ዚ ቀረባ ከፍልጥ እየ ኢላ።

እቲ ሓድሽ ሕጊ ካብ ሕዳር 8,2021 (ድሕሪ ክልተ ስሙን ጀሚሩ) ተግባራዊ ክኸውን እዩ።

እንተኾነ ካብ’ተን ኣዝየን ድኻታትን ትሑት መጠን ክታበት ዝሃባ 50 ሃገራት ግና ካብ’ዚ ኣሰራርዓ’ዚ ተጠቀምቲ ኣይክኾናን እየን። መብዛሕተአን እተን ሃገራት ካብ ኣፍሪቃ’የን።

ትሕቲ 18 ዓመት ዝዕድሚኦም ቆልዑ ካብ’ዚ ደረት’ዚ ናጻ እዮም። እንተኾነ፣ናብ ኣመሪካ ንክኣትው እንተደልዮም ካብ ኮቪድ19 ናጻ ከምዝኾኑ መረጋገጺ ሰነድ ክሕዙ ይግባእ ።