ኣህጉራዊ ፈደረሽን ቀይሕ መስቀልን ቀይሕ ወርሕን ለበዳ ኢቦላ ንምክልኻል ናይ 9.4 ሚልየን ዶላር ገንዘብ ተማሕጺኑ

ኣህጉራዊ ፈደረሽን ቀይሕ መስቀልን ቀይሕ ወርሕን ኣብ ምዕራብ ኣፍሪቃ ለበዳ ኢቦላ ንምክልኻል ናይ 9.4 ሚልየን ዶላር ገንዘብ ተማሕጺኑ።

እቲ ገንዘብ ኣብ ጊኒ: ላይበርያ: ኮትዲቫር :ማሊ: ሰነጋል ከምኡ`ውን ሰራልዮን ንምርመራን ንኮሚኒታዊ ጽርየትን ከምዝውዕል`ውን እቲ ማሕበር ኣፍሊጡ`ሎ።

ኢቦላ ዶብ ኣይግድሶን`ዩ ዝበለ ኣብ ኣህጉራዊ ቀይሕ መስቀልን ቀይሕ ወርሕን ዳይሬክተር ኣፍሪቃ መሓመድ ሙኪር፡ ኣብ ጊኒ ዘሎ ዝተቐራረበ ማሕበራውን ኤኮኖሚያውን ምትእስሳር ንምዝርጋሕ`ቲ ቫይረስ ሓደጋ ምዃኑ ይገልጽ።

ኣብ 2014 ዝተራእየ ለበዳ ኢቦላ ኣብተን ሃገራት ልዕሊ 11 ሺሕ ሰባት ምቕታሉ ይዝከር።

ጊኒ ንኢቦላ ዝኸውን 8,600 ዶስ ክታበት ካብ ኣሜሪካ ትጽበ`ላ ።

ሕቡራት ሃገራት ድማ ኣብ ጊኒን ኣብ ዲ ኣር-ሲን ንኢቦላ ንምውጋእ 15 ሚልየን ዶላር ካብ ማዕከን ህጹጽ ረድኤት የውጽእ ኣሎ ።