ኢጣልያ ስደተኛታት ጽዒነን ናብ ወደባታ ዝተጸግዓ መራኽብ ከይኣትዋ ከልኪላ

ኣብ ማእከላይ ባሕሪ ስደተኛታት ሒዛ ናብ ወደብ ሲሲሊ ተጸጊዓ ዝነበረት መርከብ ክትምለስ ተኣዚዛ።

'ሁማኒቲ 1' ዝተባህለት መርከብ ጀርመን ክትምለስ ዝተኣዘዘት 179 ሰደተኛታት ሒዛ መጺኣ እቶም 144 ክወርዱ ምስተፈቕደሎም`ዩ።

ካፒቴን እታ መርከብ ኣይምለስን ይብል ኣሎ።

ብመሰረት ጸብጻብ ኣሶሸይትድ ፕረስ ካልኦት 91 ሰባት ዝሓዛ ሰለስተ መራኽብ`ውን ብፖሊስ ኢጣልያ ናብቲ ወደብ ከይኣትዋ ተዓጊተን ኣለዋ። በዓል ስልጣን ኣምነስቲ ኢንተርናሽናል ጁልያ ሆል ድማ ሕጊ ባሕሪ ንጹር`ዩ ካብ ባሕሪ ዝደሓኑ ኩሎም ኣብ ውሑስ ቦታ ክራገፉ ኣለዎም ኢላ።

ካልእ ብዶብ ኣልቦ ሓካይም ትምራሕ መርከብ ድማ ትማሊ ሰንበት ኣብ ካታኒያ ኣትያ`ላ፡ ካብቶም ኣብኣ ዝነበሩ 572 ስደተኛታት 357 ክኣትዉ ተፈቒድሎም ኣሎ።ኣምነስቲ ኢንተርናሽናል ኢጣልያ ኣብ ምግሃስ መሰል'ቶም ስደተኛታት ምስ ሰበ-ስልጣን ሊብያ ምትሕብባራ ዘሕዝን`ዩ ይብል።