ቀ/ሚ ሱዳን ናብ መዝነቶም እንተተመልሱ'ዃ ተቓውሞታት ኣብቲ ሃገር ቀጺሎም ኣለው

ቀዳማይ ሚንስተር ሱዳን ዓብደላ ሓምዶክ ድሕሪ ናይ ሰሙናት ዕልዋ ናብ ስልጣኑ ከም ዝምለስ ተገይሩ። ወተሃደራዊ ሓይሊ ሱዳን ብተወሳኺ ንኹሎም በቲ ዕልዋ ዝተኣስሩ ክፈትሖም ቃል እንተኣተወ`ኳ፡ ናይ ተቓውሞ ሰልፈኛታት ግን ንደሞክራሲ ሰልፍና ክንቅጽል ኢና ይብሉ`ለዉ።

ሱላይማ ኻሊፋ፡ ኣብ ሱዳን ተቓላሲት ሰብኣዊ መሰላት ክትከውን ከላ፡ እቲ ዝተገብረ ስምምዕ ነቲ ኣብ ባይታ ዘሎ ኩነታት ኣይቅይሮን`ዩ ትብል። ቀዳማይ ሚንስተር ሓምዶክ ሕጂ`ውን ኣብ ትሕቲ ጸቕጢ`ዩ ዘሎ፡ ስለዚ ነዚ ውዕል ንምግባር ምኽንያታዊ ኣይኮነን ትብል ።

ቀዳማይ ሚንስተር ዓበደላ ሓምዶክ ናብ ስልጣኑ ክምለስ ምስ ወተሃደራዊ መራሒ`ታ ሃገር ኣብ ስምምዕ እንተበጽሐ`ኳ ትማሊ ሰንበት`ውን ኣብ እዋን ናይ ተቓውሞ ሰልፊ ኣብ ኦምዱርማን ሓደ መንእሰይ ብጥይት ተቐቲሉ`ዩ ። ድሕሪ ዕልዋ 41 ሰባት ሙሟቶም ይግለጽ።