ሎሚ ሚያዝያ 11፡ ወተሃደራዊ ሓይሊ ሱዳን ንፕረዚደንት ዑማር ኣል-በሽር ዝዓለወሉ መበል ራብዓይ ዓመት`ዩ። እንተኾነ ንሲቪላዊ ምምሕዳር ዝነበረ ተስፋ ገና ኣይተማልአን። ስልጣን መን ይሕዝ ኣብ ዝብል ፡ ደገፍቲ ደሞክራሲ ምስቲ ወተሃደራዊ ሓይሊ ዝገብርዎ ቃልሲ ኣይተወደአን።
ን30 ዓመታት ዝመርሐ ዑማር ኣል-በሽር ኣብ ምዕላው ዝተሳተፉ ሲቪላት፡ ሲቪላዊ መንግስቲ ንምትካል ዝነበሮም ሕልሚ ገና ኣይተጋህደን። ሓደ ሲቪላዊ ምምሕዳር ን18 ኣዋርሕ ድሕሪ ምምርሑ፡ ኣብ ጥቅምቲ 2021፡ ሓደ ሓዲሽ ወተሃደራዊ ስርዓት ስልጣን ጨቢጡ ገና`ውን ነታ ሃገር ይመርሕ ኣሎ። ኣብ ካርቱም ዳርጋ መዓልታዊ ተቓውሞ ኣየቋረጸን። መሓመድ ዓሊ ሓደ ካብ ወደብቲ`ዩ። እቲ ወተሃደራዊ ሓይሊ ኣብ ትሕቲ ሲቪላዊ ምምሕዳር`ዩ ክኸውን ዘለዎ ይብል።
“ እቲ ወተሃደራዊ ስልጣን ናጻን ዝተፈልየን ክኸውን የብሉን። እዚ ኣብ መስርሕ ምርግጋጽ ደሞክራሲያውነት ኣገዳሲ ስጉምቲ`ዩ። ሰባት ነዚ`ዮም ክቕበሉ ኣለዎም “
ወተሃደራዊ መንግስቲ ሱዳን፡ ኣብታ ሃገር ሓደ መሰጋገሪ መንግስቲ ብምቛም ናብ ሲቪላዊ ስርዓት ከም ዝሰጋገር ከፍልጥ ጸኒሑ`ሎ። ነዚ ዘተግብር ሓደ ፖለቲካዊ ሰነድ`ውን ንዝሓለፈ ሰሙን ማለት ሚያዝያ 6 ተሓሲቡ ኔሩ፡ እንተኾነ ኣብ መወዳእታ ሰዓት ተመሓላሊፉ።
ማሪያም ኣል-ሳዲቕ ኣል-ማሕዲ ካብ ሃገራዊ ኡማ ፓርቲ ኣብቲ ልዝብ ካብ ዝሳተፉ ዘለዉ`ያ፡ ዝሓለፈ መጋቢት ከምዚ ኢላ ኔራ “ እቲ ዝቐውም ግዚያዊ መንግስቲ ክዕወት እንተኾይኑ፡ ሰፊሕ መሰረት ዘለዎ ክኸውን ኣለዎ። ንሓጺር ግዜ ማለት ንሓደ ወይ ሰለስተ ወርሒ ዝጸንሕ`ውን ክኸውን ይኽእል። ፍልልያትና መዕለቢ ክንገብረሉ ይግባእ።”
ሰልፈኛታት ተቓውሞ ግን እዚ መስርሕ`ዚ ካብዚ ንላዕሊ ክናዋሕ የብሉን ይብሉ።ሰራሕተኛታት መንግስቲ ኮኑ መማህራን ንኣዋርሕ ኣይተኸፍሉን፡ መንግስቲ`ውን ካብ ስራሕ ወጻኢ`ዩ ኮይኑ ዘሎ ዝብል መረረት የስምዑ።
ሚንስተር ገንዘብ ሱዳን ጂብሪል ኢብራሂም ግን፡ ሲቪላዊ መንግስቲ ንምትካል ቀሪብና ኢና ይብል።
