ዋሽንግተን —
ምኽትል ፕረዚደንት ኣመሪካ ካሜላ ሃሪስ ምስ ፕረዚደንት ፊሊፒንስ ፈርናንዲ ማርኮስ ጁኔር ሎሚ ሰኑይ ኣብ ማኒላ ተራኺበን። ሚንስተር ምክልኻል ኣመሪካ ሊዮድ ጀይ ኦስተን ኸኣ ምስ ናይ ኢንዶኔዥያ መዘነኦም ፕራቦዎ ሳብያንቶ ተራኺቦም ኣብ ሓባራዊ ጉዳያትን ረብሓታትን ተመያይጦም’ለዉ።
ካሜላ ሃሪስ ናብ ፊሊፒንስ ዝኸዳ ኣብ ታይላንድ ኣብ ዝተኻየደ ዋዕላ ምትሕብባር ቁጠባ ኤስያ ፓስፊክ ድሕሪ ምክፋለን’የን። ቅድሚ’ዚ ዑደተን ሓደ ላዕለዋይ በዓል ስልጣን ኣመሪካ ብመሰረት ዝሃብዎ መግለፂ ካሜላ ሃሪስ ምስ ፕረዚደንት ፈርናንዲ ማርኮስ ዝተራኸባ ኣብ መንጎ ሃገራቶም ንዘሎ ምትእስሳር ቁጠባ ንምሕያል’ዩ።
ሚኒስተር ምክልኻል ኣመሪካ ሊዮድ ጀይ ኦስተን ኸኣ ምስ ሚኒስተር ምክልኻልኢንዶኔዥያ ፕራቦዎ ሳቢያንቶ ኣብ ጃካርታ ተራኺቦም ብዛዕባ ዞባዊ ጉዳያት ምክልኻል ድሕሪ ምዝርራቦም ኣብ ዝሃብዎ ሓባራዊ ጋዜጣዊ መግለፂ ምምሕዳር ባይደን ኢንዶኔዥያ ኣብቲ ዞባ ሓጋዚ ግደ ክትፃወት ከምዝደሊ ተዛሪቦም’ለዉ። ኦስተን ጃካርታ ዝኣተዉ ድሕሪ’ቲ ኣብ ካናዳ ዝተኻየደ ዓለምለኸ ኣኼባ ፀጥታ’ዩ።
