መቐለ —
ሰራዊት ኢትዮጵያ ክልተ ተወሳኺ እዝታት ከም ብሓዱሽ ምጥያሱ ምግላፁ ስዒቡ መንግስቲ ክልል ትግራይ ምስቲ ክልል ብዝተተሓሐዘ ሰራዊትን ኣጽዋር ኩናትን ምንቅስቓስ ኣይከኣልን ክብል ኣብ ዘውጾ መግለጺ ኣፍሊጡ::
ሰራዊት ምክልኻል ዝወሃበኒ ወፍሪታት ብቕልጡፍ ንምፍፃም የኽእሉኒ እዮም ዝበሎም ክልተ እዝታት ከም ሓዱሽ ምጥያሱ ኣብ ዝሓለፈ ሰሙን ገሊፁ::
መንግስቲ ክልል ትግራይ ብቕድሚ ትማሊ ቀዳም ኣብዘውፀኦ መግለፂ: ኣብዚ ሕጂ እዋን ኣብ መሪሕነት ዘሎ መንግስቲ ፌደራል ሰራዊት ምክልኻል ከምብሓዱሽ ክውድብ ስለዘይኽእል: "ምስ ክልል ትግራይ ዝተኣሳሰር ውሳነታት ምውፋር፣ ምትዕርራይ ኣወዳድባን መሪሕነትን፣ ዝግበር ምንቅስቓስ ሰራዊት ኮነ ኣፅዋር ፍፁም ተቐባልነትን ተፈፃምነትን የብሉን" ኢሉ::
