ምላሽ ፈደራል መንግስቲ ኢትዮጵያ ኣብ ኩነታት አላማጣ

ምኽትል ቀዳማይ ሚንስተርን ምኽትል ኣቦ መንበር ገዛኢ ፓርቲ ኢትዮጵያ ብልፅግናን ኣቶ ኣደም ፋራሕ ነቲ ኣብዚ ሰሙን ኣብ ደቡብ ክልል ትግራይ ከተማ ኣላማጣ ዝተፈጠረ ኩናታት ኣመልኪቶም ምስ ሃገራዊ ቴሌቪዥን ኣብ ዘካየድዎ ቃለ መሕተት “ሕቶ ይግበኣኒ ዝለዓለሎም ከባቢታት ብሕጋዊ፣ ሰላማዊን ውሳነ ህዝብን ዝረጋገፀሉ ኣገባብ ንምፍታሕ ተደጋጋሚ ዘተታት ከምዝተገብረሉን አብ ስምምዕ ዝተበፅሐን ከምምዃኑ መጠን ንመምርሕታት እቲ ስምምዕ ምኽባር አገዳሲ ኢዩ” ክብሉ ተዛሪቦም።

ንሶም ወሲኾም ብመሰረት እቲ ስምምዕ ፌደራል መንግስቲ ንትግባርኡ ዝተፈላለዩ ስራሕቲ የሳልጥ ምህላው ብምግላፅ ካብዚ ወፃኢ ዝግበር ጎንፅን ፅሕተራን ፈፂሙ ተቀባልነት ዘይብሉ ምዃኑ ኩሎም ኣካላት ክርድእዎን ንስምምዕ ፕሪቶሪያ ምጥሓስ ምዃኑን ብምርዳእ አብ መድረክ ይኹን አብ ትግባርኡ ነዚ ስምምዕ ዝጥሕስ ኮነ ዕለታዊ ሰላምን መነባብሮን ህዝቢ ዝርብሽ ተግባራት ካብ ምፍፃም ክቁጠቡ ኣተሓሳሲቦም።