እስራኤል ኣማራጽታት ግብረመልሲ ንመጥቃዕቲ ኢራን ኣብ ትርእየሉ ኣመሪካ ርእሳ ክትገትእ ትላቦ

እስራኤል ኣብ መወዳእታ ዝሓለፈ ሰሙን ካብ ኢራን ንዝተፈነወላ መጥቃዕቲ ሚሳይላትን ሰብ ኣልቦ ነፈርትን ምላሽ ንምሃብ ትዳልው ኣብ ዘላትሉ እዋን ኣመሪካን መሻርኽታን ድማ ቀዳማይ ሚንስተር ቤንያሚን ነታንያሁ ንተአፋፊነት እቲ ኩነታት ብምግንዛብ ሰፊሕ ዞባዊ ግጭት ንዘይምዕዳምን ንዘይምጉህሃርን ክጽዕር ይምሕጸኑ።

ትማሊ ሰሉስ 16 ሚያዝያ 2024 እስራኤል ካብቶም ብቐዳም ኢራን ዘወንጨፈቶም ብኣማኢት ዝቑጸሩ ሚሳይላትን ሰብ ኣልቦ ነፈርትን ሓደ እዩ ዝበለቶ ኣርእያ። እዚ ብቐጥታ ካብ መሬት ኢራን ናብ እስራኤል ዝተፈነወ መጥቃዕቲ ምዃኑ እዩ።

ኢራን ነቲ እስራኤል ኣብ መጀመርያ እዚ ወርሒ ኣብ ሶርያ ኣብ ልዕሊ ዲፕሎማስያዊ ህንፃኣ ዝፈጸመቶ መጥቃዕቲ ዝተዋህበ ግብረ መልሲ ምዃኑትገልፅ። እስራኤል “ኢራን ሳዕቤን ተግባራታ ክትቅበል እያ። ብመሰረት እቲ ፍፃመ ድማ ምላሽና ንምሃብ ንመርፅ” ክትብል ሕነ ከምትፈዲ ቃል ኣትያ።