ቀጻሊን ሓደ ሓደ ጊዜን’ውን ህውከት ሓዘልን ጸረ መንግስቲ ተቓውሞታት ኣብ ኢትዮጵያ ክልል ኦሮምያ ካብ ዝጅምር ሓደ ዓመት ኣቑጺሩ'ሎ። ኣብ ኢትዮጵያ እቲ ብብዝሒ ህዝቢ ቀዳማይ ደረጃ ዝሕዝ ህዝቢ ኦሮሞ ንዝያዳ ፖለቲካዊ ነጻነትን ኢኮኖሚያዊ ተረባሕነትን ዘለዎ ጠለባት ምላሽ ንምርኻብ ክሳብ ክንደይ’ዩ ምድላዋት ኣሎ ብዝተፈላለዩ ወገናት ዝለዓል ዘሎ ሕቶ እዩ።
ኣብ ኢትዮጵያ ክልል ኦሮሚያ ተቓወምቲ ሰልፈኛታት ንኩባኒያታት ወፃኢ ኣጥቒዖም ሚሊዮናት ዶላር ዝፈሰሶም ኢንቨስትመንታት ተባሪዖምን ናብ ሓሙኽሽቲ ተቐይሮም እዮም።እቲ ናዕቢ መንግስቲ ናይ ህፁፅ እዋን ክእውጅ ኣገዲዱዎ እዩ።ናብ ዞባ ኣርሲ ከተማ ዶኒ ከባቢ ዘሎ ሓደ ኩባኒያ ብሓገዝ ማሕበረሰብን ሽማግለታት ዓድን ከመይ ካብ መጥቓዕቲ ከምዝድሓነ ነበርቲ ንድምጺ ኣሜርካ ይገልጹ።
ኣብ ኢትዮጵያ ብምኽንያት ህፁፅ ኣዋጅ ተኣሲሮም ዝነበሩ ኣስታት 2,000 ሰባት ከምዝተፈትሑ ተገሊፁ።ብመንግስቲ ዝውነን ፋና ብሮድካስቲንግ ኮርፖሬት እቶም እሱራት ካብ መንግስቲ ህንፀትን ምኽርን ምስተውሃቦም ከምዝተፈትሑ ፀብፂቡ’ሎ።
ሕብረት ኣውሮጳን ንዓለምለኸ ማህበረሰባትን ኣብ ልዕሊ ኢትዮጵያ ተሪር ስጉምቲ ክውሰድ ጉጅለ ተሓላቂ ሰብኣዊ መሰላት ሁማን ራይትስ ዎች ጸዊዑ።
ኣብ ኢትዮጵያ ብዘጋጠመ ደርቂ: ህጻናት ንሕጽረት መግቢ፡ ንሕማምን ንትምህርቲ ምቁራጽን ይቃልዑ’ለው።
