Monday, July 28, 2014 ሰዓት'ቲ ከባቢ 16:24

Horn of Africa

ሰበስልጣን ኣሜሪካ ንጉዳይ ኢትዮጵያ ትኹረት ንኽህቡን ዝተኣሰሩ ንኽፍትሑን ንምሕታት ኢትዮጵያዊያን ስነስርዓት ምብራህ ሽምዓ ኣካይዶም

ሰበስልጣን መንግስቲ ኣሜሪካ ኣብ ሓዱሽ ናይ ፈረንጂ ዓመት ንጉዳይ ኢትዮጵያ ትኹረት ንኽህቡ ንምትሕስሳብን ኣብ ኢትዮጵያ ብዘይኣግባብ ተኣሲሮም ንዝበሉዎም ፖለቲካዊ እሱራት ንኽፍትሑን ንምሕታት ኣብ ዋሽንግተን ዲሲን ከባቢኡን ዝነብሩ ውሱናት ኢትዮጵያዊያን ትማሊ ሰንበት ምሸት 21 ታሕሳስ 2005 ዓ/ም ስነስርዓት ምብራህ ሽምዓ ኣካይዶም።

ኣብ ዋሽንግተን ዲሲን ከባቢኣን ዝነብሩ ኢትዮጵያዊያንን ትውልደ ኢትዮጵያዊያንን ስነ ስርዓት ምብራህ ሽምዓ ዘካየዱ ኣብ ፊት ንፊት ቤተ መንግስቲ ዋይት ሃውስ ነይሮም።

 ነቲ ስነስርዓት ዘዳለዎ ማርች ፎር ፍሪደም ዝተብሃለ ትካል እዩ።እቲ ትካል ቅድም ክብል ኣብዝበተኖ ፅሑፍ ‘’ወገናትና ብሰላማዊ መንገዲ ንነፃነት፣ንፍትሒ፣ንማዕርነት ደቂ ሰባትን ንምኽባር ሰብኣዊ መሰላትን ስለዝሓተቱ ኣብ አፍቖዶ ኣብያተ ማእሰርቲ ምድጓኖምን ኣብ ናይ ሕልና እሱራት ይበፅሕ ዘሎ ኣረመናዊ ጭካነን ኣዝዩ ኣሕዚኑና’ሎ’’ ክብል ይገልፅ።

 መቅደሰ ዝተባህሉ ካብቶም ነቲ ስነስርዓት ዘዳለው ሓደ ከምዝገለፅዎ ማርች ፎር ፍሪደም ኣብ ኢትዮጵያ ኣብ ልዕሊ ሰብኣዊ መሰላት ንዝፍፀሙ መግሃስቲ እናተኸታተለ ንሰበስልጣን መንግስቲ ኣሜሪካ ከፍልጥ ከምዝፀንሐ ሓቢሮም።

 ንዝኾነ ይኹን ጉጅለ ወኪልና ኣይኮናን ኣብዚ ተረኺብና ዝበሉ ኣቶ መቅደሰ ‘’ኣብ ኩሉ ኩርናዕ ኢትዮጵያ ካብ ሰሜን ጀሚሩ ክሳብ ደቡብ፣ካብ ምብራቕ ክሳብ ምዕራብ ህዝቢ ኣብ ቤት ማእሰርቲ እናተዳጎነ እዩ።ግፍዒ እናተፈፀሞ እዩ።’’ኢሎም።

ጋዜጠኛታት ሓሳቦም ብምግላፆም፤ካልኦት ድማ ብምኽንያት እምነቶም ኣብ ልዕሊኦም ይፍፀም ዘሎ መግሃስቲ ጠጠው ንኽብልን ነታ ሃገር ብሽም ህዝቢ ዝውሃብ ሓገዝ እውን ነቲ ህዝቢ ምግሃስቲ ይውዕል ስለዘሎ ጠጠው ንኽብልን ከምዝሓተቱ ሓቢሮም ኣቶ መቅደሰ።
ኣብቲ ስነስርዓት ካብ ሓደ ክሳብ ክልተ ሚእቲ ዝኾኑ ሰባት ከምዝተረኸቡ ኣቶ መቅደሰ ሓቢሮም።

መንግስቲ ኢትዮጵያ ኣብ ማእሰርቲ ዝርከቡ ብምእነቶም ወይ’ውን ብምዝራቦምን ብምፅሓፎምን ከይኮነስ ኣብ ናይ ሽብር ተግባር ብምስታፎም እዩ ይብል።

 ንሕግታት ፀረ ሽብርን ነቲ ስርዓትን ዝነቕፉ ናይ ውሽጢ ሃገር ተቓወምትን ዓለምለኸ ትካላትን ግን ብናይ ሰብኣዊ መሰላት ኣተሓሕዝኡ ንመንግስቲ ኢትዮጵያ በብእዋኑ ይወቕሱዎ።