ኣማሓዳሪ ኢስታንቡል ቫሲፕ ሳሂን ኣብ መዕርፎ ነፈርቲ ኢስታንቡል ቱርኪ ኣብ ዘጋጠመ ግብረሽበራዊ መጥቃዕቲ ብውሑዱ 28 ሰባት ከምዝተቐትሉን ካልኦት 60 ሰባት ድማ ከምዝቖሰሉ ሓቢሩ።
ድሒሩ ካብ መደበር ተለቪዥን ሲኤንኤን ዝተረኽበ ሓበሬታ ድማ እቲ ቁጽሪ በቲ መጥቃዕቲ ዝሞቱ ናብ 31 ክብ ኢሉ ኣሎ። ቁጽሪቶም ዝቖሰሉ ድማ 147 በጺሑሎ።
ጸብጻባት ካብቲ ቦታ ከምዝሓበርዎ እቲ መጥቃዕቲ ብምውህሃድ ተተኮስትን ተፈንጀርትን ዝተቐናበረ ምንባሩ ገሊጾም።
ዋላኳ ቁጽሪቶም ኣጥቃዕቲ ብንጹር እንተዘይተፈልጠ፤ ኣማሓዳሪ ኢስታንቡል ግን ብውሑዱ ሰለስተ ነብሰ ቕትለታዊ መጥቃዕቲ ዝፈጸሙ ኣሸበርቲ ምንባሮም ሓቢሩ።
ኣብ መዕርፎ ነፈርቲ ኢስታንቡል ዘጋጥም ዘሎ መጥቃዕቲ ግብረሽበራውያን ኣብ ዝሓለፈ ሰለስተ ወርሒ እዚ ንካልኣይ ግዜኡዩ።
